Maxxansa Oduu, Lak. 4
Ebla 10, 2001

Walgahiin OPDO kan dura taa’ummaa Mallasiin geggeeffamu erge jalqabee kunoo bultii kudhan gahee jira. Mallas anatu isaan caalaa beeka jechuun, kitaaba sana anatu barreessee kanaaf yoo an ibseef irra galaaf jechuun, dabalees sodaa OPDO irraa qabu irraa kan ka’ee hojii isaa dhiisee wal gahii OPDO geggeessaa jira. Walgahichi akka silaa yaadametti deemaa akka hin jirre odeessi naannoo sanaa bahan ni ibsu.

Mallas sanbataa fi dilbata osoo (Ebla 5 fi 6, 2001) addaan hin dhaabin walgahicha itti fufee waa’ee ‘Dhiphummaa’ irratti lecture godhe. Guyyaa lama guutuu hogganoota OPDO dhiphummaa jechuun maal akka ta’e erge barsiisee booda amansiiseera jedhee ture. Wiixata oggaa walgahiin itti fufu garuu kan Mallas abdate bakkaa hiiqee faallaa isaa hogganooti OPDO guyyaa lama guutuu gaaffiin Mallas sardan. Waggaa kudhan cufaa waan isaan gubee waxalaa ture guyyaa lamatti of keessaa baasan. Waan Wayyaaneen waggootii dabran hundaa ummata Oromoo irratti ifaa fi dhoksaan raawwatte hundaa osoo hin hambisin gaafatan. Walumaa galatti Oromummaan OPDO har’a dhalatte jechuun ni danda’ama. Dhugaa dubbatanii bakka namatti dhi’e buluu wayya kan jedhanis kanuma ta’a.

Gaaffiilee fi yaada hogganootii OPDO Mallasiif dhiheessan baayyee keessaa haga odeessa arganne armaa gaditti isinii dhiheessina.

Dhiphummaa ati jettu yoo ilaalle Tigiree caalaa dhiphoon jiraa? Dhiphummaan osoo oftulummaan hin jiraatin eessa dhufe? Saba Oromoo akka jirutti dhiphoo dha jechuun akkamitti danda’ama? ‘Nuti kan beeknu dhiphoon Oromoo osoo hin taane Tigiree dha. Yeroo ammaa kana ammoo dhiphummaa qofa osoo hin taane oftulummaa illee jalqabdanii jirtu. Nutu waan hundaa beeka jettu. Sabni biraa doofaa dha jettu. Joortuun keessan illee kanaan nutti boonaa jirti.’ jedhaniin.

Miseensoti hoggana OPDO dhiphummaa Tigree oggaa Mallasiif ibsan: a) Caasaa mootummaa keessaa bakka bu’aa qabduu fi furtuu taate hundaa ilmaan Tigiraay qabsiiftanii jirtu. Kun dhiphummaa mitii? b) nu duwwaatu amanamaa dha, bulchuus nutu danda’a, sabni kaan cinaa dhaabbatee ilaalu qaba yaada jedhu qabdu. Ilaalchi akkasii dhiphummaa mitii? c) hoggana OPDO fi ummata Oromoo irraa amantaa waan dhabdaniif ilma Tigraay Solomon Tesfaye nutti rammadanii inni piresidaantii dhugaa ta’ee akka bulchu gootan. Oromiyaa kan bulchu Caffee Oromiyaa osoo hin taanee Solomon Tesfaye bakka bu’aa TPLF dha. Kun dhiphummaa keessan hin agarsiisuu? d) Tigiraayin dagaagsina jettanii, Tigiraay naannoo lolaan miidhamte jettanii qabeenyaa ummatootaa saamtanii achi dabarsuun keessan dhiphummaa mitii? e) Nama gochaa keessan isin irratti baree maaliif akkas gootu jedhee dubbatu ajjeessuu, hidhuu fi ukkaamsuun keessan, maqaa dhipho jedhu namatti maxxansuun akka barbaaddan miidhuun dhiphummaa keessan mitii? f) Nama waan isin gootan hubatee maaliif akkas ta’a jedhee isin gaafate kun ABO jettanii jimlaatti hidhuu fi ajjeessuun keessan dhiphummaa mitii? g) Nama dhalootaan Tigiraay ta’eef liqii baankii, investment fi hayyama daldalaa kennuun warra kaan dhorkachuun dhiphummaa mitii? Karaa hundaan nama dhalootaan Tigiraay ta’eef dursa kennun kaan gad qabuun dhiphummaa dha ittiin jedhan.

Dinagdee biyyichaa akka jirutti kan qabatee jiru Wayyaanee fi ilmaan Tigiraay ta’uu ni wallaalle isinitti fakkaata. Wayyaanee duwwaan dhaabbata daldalaa 20 ol akka qabu ni beekna. Kanatti dabalee daangaa Keeniyaa Moyyaalee haga Maqaleetti, daangaa Jibuutii kaasee Finfinnee bira dabree haga Sudaanitti meeshaa daldalaa qaraxa malee kan humna waraanaan ajjabamanii kontirobaandii nagadaa jiran ilmaan Tigiraay duwwaa akka ta’an ni wallaalle isinitti fakkaataa?

Ummata Oromoo fi saboota ollaa jiran gidduutti nagaan akka hin buune akka gochaa turtan ni beekna. Lafa Oromoo murtanii naannoolee gara biraaf kennuun akka waldhabbiin uumamu godhaa akka turtan kan wallaalle isinitti fakkaataa? Fakkeenyyaaf Oromiyaa fi naannoo Somalee gidduu waa’ee daangaa irraatti waldhabbii jiru karaa nagaa furuun osoo danda’amuu isin garuu akka hin furamne gootan. Kana waan hin beekne isinitti fakkaata.

Naannoon Tigiraay lolaan hubame jechuun waan hundaa gara sanatti dabarsaa akka jirtan ni wallaalle seetanii? Fakkeenyaaf humna ibsaa Finca’aa bahu osoo kutaaleen naannoo jiran hin argatin Tigiraayf geessuun keessan dhiphummaa keessan tolchee agarsiisa. Akkanumas tajaajila telefoonaa naannoo Tigiraay dursa kennuun har’a Tigiraay satelite telephone yeroo argattu naannoolee kaan maal argatan? Kun eenyuuf akka hojjattan fi yaaddan nuu mirkaneessa.

Finfinnee keessaa kan baane waan isin nurraa fudhattanii osoo hin taane Finfinnee keessatti bakka waajjira itti ijaarrannu gaafannee waan nu dhorkattaniif malee isin nu hin baafne. Har’as ta’u bor Finfinneen kan Oromoo ti. Mirgi Oromoon Finfinnee keessatti qabu tikfamuu qaba.

Baajata ilaalchisee loogii guddaa isin gootan ni beekna. Tigiraayif baajatni guddaan yeroo ramadamu kan Oromiyaa ammoo isheen ramadamte illee yeroodhaan nu hin geessu. Akka hojii irra hin olle gufuu adda addaa keessanii dhuma bara baajataa irratti dhimma itti bahuu dadhabdan jettanii akka Tigiraayitti dabarsitan ni beekna. Baajata keenya garii akka hiitan ni beekna. Waan sagantaan qabame hojii irra oolchuuf yeroo caal-baasiin nurraa tura. Kun hundi akka nuti naannoo keenya hin guddifneef kan godhamuu dha.

Solomoon Tesfaayee akka Oromiyaa bulchuuf nutti ramaddan irraa siyaasaa keessan hedduu barre. Duraan dhugumaan waan wal qixxummaa sabootaaf dhaabbattan nutti fakkaata ture. Amma garuu maalummaa keessan tolchinee hubannee jirra.

Oromoo akka isin hin amanne kan itti hubanne keessaa tokko waardiyaa Kumaaf ramaddan irraa ti. Kumaan dhugumaan ilma Oromoo yoo ta’e Oromoo keessaa ilmaan amanamoo kan isa waardiyeessuu danda’an dhabamaniiti moo isin maaliif waardiyaa isaa Tigiroota gootan? Oromoo irra Kumaaf amanamaan Tigiree jechuu dhaa?

Walummaa galatti hogganooti OPDO waan bara kudhaniif garaa isaan gubaa ture of keessaa baasanii hafuura fudhatan jechuu dandeenya. Oggaa walgahii irratti namni tokko qabxii jabduu kaasee Mallasiin gaafatu miseensoti mana keessa jiran "Uffee! Ishoo! Akkas malee!" jedhanii hafuura dheeraa baafachuun qabanneeffataa akka turan odeessi nu gahe niibsa.

Deebii Mallas

Mallas gaaffiilee fi yaadota dhihaataniif guyyaa lamaan cal’isee dhaggeeffataa turee dhuma irratti deebii kennuu eegale. "Akkuma jettan dhiphummaan ni jira, hin jiru jechuu hin dandeenyu. Maqaa Tigiraayiin kophaatti wal gurmeessuunis tureera. Maqaa Tigiraayin walii yaaduu fi wal fayyaduunis tureera. Ummata biraa irraa adda of baafnee of ilaalunis tureera." jedhe. Rakkoo kana keessaa akka qulqulluu ta’eetti of dhiheessuuf yaalii godheen kana hundaa gartuu fottoqee bahetu raawwate jechuu barbaade. Waan hin fakkaanne. Beekumsa isaan alatti, ajaja isaan alatti, wal marii isaatiin alatti kan dalagame tokko illee akka hin jirre ummatni ni beeka. Mallas akkas haasa’uun namooti jajjabaatanii caalaatti itti fufanii akka dubbatan gochuun eenyu maal akka dubbatu adda baafatee bor billaan isaan muruuf ta’uu ni mala. Kunis ta’u sun hogganooti OPDO waan seena qabeessa hojjataa akka jiranitti hubatama. Dhugaa dubbatanii bakka namatti dhi’e buluu wayya kan jedhamus kanumaaf mitiiree?

Hogganoota OPDO keessaa kan yaada Mallas gargaaran Kumaa Dammaqsaa Tigirticha afaan Oromoo beeku kan yeroo ammaa dura taa’ummaa OPDO Mallas irraa fudhate, kan Mallas cinaa taa’ee yeroo Mallas bishaan Amboo burcuqqoo keessaa fixu itti guutuu dirqama fudhatee fi miseensota lama duwwaa dha. Isaanis Girmaa Birruu fi Ali Abdoo dha. Kumaan gaaffiilee mana keessatii ka’anii fi waan Mallas haasa’e irraatti yeroo yaada isaa kennatu "ummatni Tigiree dhiphoo dha jennee qabsaa’ota hedduu achi keessaa bahan akka hin dhabne of eeggachuu qabna" jedhe. Yaa qaanii! Namtichi Oromoo akka Tigireef dhimmuu isaatiin ifa baafate. Mallas kan inni itti of mi’eessuuf akkas dubbate illee haasawa Kumaa kana harkaa hin fuune. Girmaa Birruu ammoo Oromummaa isaa lagatee " dhiphummaan Oromoo bira ni jira, nuti Itophiyaawii dha" jedhee yaada isaa kennate. Girmaan maqaa Oromoo golgatee eenyummaa isaa dhoksaa ture har’a ifa baafate jechuu dha.

Mallas nama haxxee ta’uu deebii innii hogganoota OPDOf kenne irraa hubachuun ni danda’ama. Waan hogganooti OPDO dhiheessan kan fudhate fakkaatee Mallas deebi’ee isaan yakkuutti ka’e. "Isin dirqama keessan bahuu hin dandeenye. Nama ofitti qabuu hin dandeessan. Namni barate isin hin jaallatu. Barataan Oromoo hundi ABO dha. Kunoo nama (miseensa) dhabdanii iddoo ittigaafatamummaa irratti ABO muudan mitii?" jedhee aarii fi dheekkamsaan dubbate. Eenyuuf akka akeekkate garuu hubachuu hin Waan Mallas jedhe kana eenyu illee akka hin amanne beekamaa dha.OPDOn akka jibbamtu kan godhe eenyu ta’eeti?

Gaaffiilee

Walgahiin OPDO kun itti bahiinsi isaa maal ta’inna? Xumurri walgahii kanaa maal ta’a? Oromoon waan deemaa jiru kana akkamitti ilaala? Mallas hogganoota OPDO kana gargar baasee deebisee isaan wal irratti duulchisinnaa? Hogganooti OPDO kun akkuma amma jabaatanii dura dhaabbataa jiranitti itti fufu moo of duuba deebi’u laata? Haala amma deemaa jiru irraa waanti tokko beekamee jira. Kunis Oromoon eessa iyyuu haa jiraatuu yaadaan walitti dhihaataa jira. Oromoon waan saba isaa miidhu tole jedhee bira dabraa akka hin jirre mirkanaawaa jira. Walumaa galatti kan beekamaa jiru ammaan boodatti Oromoo akka duraanitti bituun hin danda’amu.